سردار ابراہیم کی تحریک آزادی کیلئے خدمات کو ہمیشہ یاد رکھاجائے گا، چوہدری رحمت

میرپور(آئی این پی)پاکستان پیپلزپارٹی یورپ کے نائب صدر چوہدری رحمت اللہ نے کہا ہے کہ بانی صدر آزادکشمیر سردار محمدابراہیم خان ایک عظیم اور جرات مند قائد تھے جنہوں نے ڈوگرہ مہاراجہ کے بدترین عہد میں قرارداد الحاق پاکستان کی منظوری میں اہم کردار ادا کیا تھا۔ سردار محمدابراہیم خان نے نا مساعد حالات میں اہل کشمیر کی قیادت کی اور وہ یہ وہ دور تھا جب ریاست جموں وکشمیر پر شخصی حکمرانی قائم تھی اور خوف اور دہشت کی فضا کے باعث لوگوں کاسانس لینا دشوار تھا۔ ان خیالات کا اظہار انہوں نے اپنے ایک بیان میں کیا۔ چوہدری رحمت اللہ نے کہا کہ مسئلہ کشمیر کو بین الاقوامی سطح پر اجاگر کیا۔ان کی ساری زندگی تحریک آزادی کیلئے جدوجہد میں گزری وہ ایک بااصول سیاستدان ،باکردار اور کشمیریوں کا درد رکھنے والے لیڈر تھے۔ جب بھی کسی فورم پر کشمیر کی بات ہوتی تو وہ اپنے اصولی موقف پر ڈٹ جاتے، پاکستان کے بڑے بڑے سیاستدانوں کے سامنے ہمیشہ حق بات اور اصولوں کی بات کرنے سے ڈرتے نہیں تھے۔ اس لحاظ سے ان کے کردار کی کوئی مثال نہیں دی جاسکتی۔ ان کے کار ہائے نمایاں اور بتائے ہوئے اصولوں کے مطابق ہمیں حق و سچ کا ساتھ دینا چاہئے۔ تحریک آزادی کی کامیابی کیلئے اسی راستہ کو اپنانا ہوگا۔