اسماعیل ہانیہ کا قتل ناقابل قبول ہے،آزادکشمیر سول سوسائٹی

مظفرآباد(صباح نیوز)آزادکشمیر سول سوسائٹی کے بزرگ رہنمائوں نے کہا ہے کہ حماس کے سیاسی سربراہ اسماعیل ہانیہ کا قتل ناقابل قبول ہے، سابق وزیراعظم فلسطین کی شہادت سے فلسطین کی تحریک آزادی ختم نہیں ہوگی،اس تحریک میں اسماعیل ہانیہ اور ان کے خاندان کی قربانیاں رائیگاں نہیں جائیں گی۔ اسماعیل ہانیہ شہادت کے جذبہ سے سرشار تھے،ان کی شہادت سے دلی صدمہ پہنچا ہے،آزادکشمیر کی سول سوسائٹی اسماعیل ہانیہ کی شہادت پر ان کے خاندان اور اہل فلسطین کیساتھ غم میں شریک ہے، ان کی شہادت سے فلسطین کی تحریک آزادی ختم نہیں ہوگی بلکہ تحریک میں نیا جذبہ آئے گا۔ان خیالات کا اظہار آزادکشمیر سول سوسائٹی کے رہنمائوں راجہ ممتازخان سید نذیرحسین شاہ، قاضی محمد صدیق، شیخ سراج منیر، محبوب اعوان شیخ جہانزیب، حمید اعوان،پروفیسر افضل اعوان نے گزشتہ روز میڈیا سے خصوصی گفتگو کرتے ہوئے کیا۔ انہوں نے کہا کہ بین اقوامی سازش کے تحت فلسطینی سیاسی رہنما کو شہید کیا گیا ۔اسرائیلی ایجنٹوں کی بزدلانہ کارروائی سے دنیا کا امن برباد ہوجائے گا۔ ایرانی حکومت پر بھاری ذمہ داری عائد ہوتی ہے کہ وہ فوری تحقیقات کر کے یہ معلوم کرے کہ اس اہم نوعیت کے عالمی رہنما تک قاتل کیسے پہنچے۔ اس موقع پر سول سوسائٹی کے رہنمائوں نے شہید ہونے والے حماس کے رہنما اسماعیل ہانیہ اور ساتھیوں کے بلند درجات کی دعا کی اور کہا کہ اسوقت امت مسلمہ کو ایک پلیٹ فارم پر اکھٹا ہونے کی ضرورت ہے،اگر ایسا نہ ہوا تو ہر طرف تباہی ہی تباہی نظرآرہی ہے انہوں نے مسلم امہ کے اتحاد کیلئے بھی دعا کی۔