فائروال سے سوشل میڈیا مواد پر قابوپانا مفروضے ہیں، شزہ فاطمہ

اسلام آباد (آئی این پی) وزیر مملکت برائے آئی ٹی و ٹیلی کمیونی کیشن شزہ فاطمہ خواجہ نے کہا ہے کہ فائروال سے سوشل میڈیامواد پر قابوپانا مفروضے ہیں۔ بلاوجہ چیزوں کومتنازع بنایا جاتا ہے،تمام سوشل میڈیاکھلا ہے۔ پارلیمنٹ ہائوس میں صحافیوں سے گفتگو کرتے ہوئے انہوں نے کہا کہ ٹویٹر کو بھی دیگر سوشل میڈیا پلیٹ فارمز کی طرح پاکستانی قوانین کی پابندی کرنا ہوگی۔ حکومت کو زبان بندی کرنا ہوتی تو ٹویٹر کے بجائے ٹک ٹاک اور فیس بک بند کرتی۔شزہ فاطمہ مزید کہا کہ ٹوئٹرکی جانب سے پاکستانی قوانین پرعملدرآمد نہ کرنا ایشو ہے۔ ٹک ٹاک مقامی قوانین پر 95 فیصد عملدرآمد کرتا ہے، فیس بک مقامی قوانین پرعملدرآمد کرتی ہے ٹوئیٹر کوبھی کرنا ہوگا۔ وزیرمملکت شزہ فاطمہ نے فائروال کی تنصیب کے سوال کا واضح جواب دینے سے گریز کیا۔