اراکین اسمبلی کو پارلیمانی معاونین فراہم کئے جائیں گے،سپیکرپنجاب اسمبلی

لاہور ( این این آئی) سپیکر پنجاب اسمبلی ملک احمد خان نے کہاہے کہ پنجاب کے12کروڑ عوام کی زندگی کو بہتر بنانے کیلئے مضبوط اور موثر قانون ساز اسمبلی انتہائی ضروری ہے، اراکین اسمبلی کو پارلیمانی معاونین فراہم کیے جائیں گے۔یورپی یونین کے پروجیکٹ مستحکم پارلیمان کے زیر اہتمام بھوربن میں سٹریٹیجک پلاننگ کمیٹی کے اراکین کی تین روزہ تربیتی ورکشاپ منعقد ہوئی۔ تقریب کے مہمان خصوصی سپیکر پنجاب اسمبلی ملک احمد خان تھے۔اس موقع پر سپیکر نے کہاکہ قانون ساز اسمبلی کے کام کو بہتر بنانے کے لیے بھر پور تعاون کریں گے۔ انہوں نے ارکانِ اسمبلی کو پارلیمانی معاونین فراہم کرنے کا بھی اعلان کیا۔سپیکر نے کہا کہ وہ پچھلی دو دہائیوں سے اسمبلی کی صلاحیتوں کو بہتر بنانے اور بڑھانے کے لیے کوشاں ہوں، آئندہ بھی صوبائی اسمبلی پنجاب کی کارکردگی کو بہتر بنانے کے لیے اپنا کام جاری رکھیں گے۔ انہوں نے کہا کہ بطورسپیکر ایوان کی کارکردگی کو بہتر بنانے کے لئے پرعزم ہوں، حکومتی نگرانی کے لیے قائمہ کمیٹیوں کی کارکردگی کو بہتر بنائیں گے۔ انہوں نے مزید کہا کہ خواتین ممبران کی اسمبلی کی کارروائیوں میں بھرپور شرکت کو یقینی بنایا جائے گا۔