لنڈی کوتل:نامعلوم افراد کی فائرنگ سے دوپولیس اہلکاروں سمیت 3افراد جاں بحق

لنڈی کوتل (نمائندہ جنگ) لنڈی کوتل میں چوکی میں تعینات پولیس اہلکاروں پر سدو خیل پھاٹک کے پاس واقع پٹرول پمپ کے قریب گشت کے دوران نامعلوم افراد نے فائرنگ کردی جس سے دواہلکارشہید ہوگئے۔ سرکاری ذرائع نے تصدیق کرتے ہوئے بتایا کہ گزشتہ رات تقریبا" 12بجے مسلح افراد نے سدو خیل پھاٹک کے قریب خودکار ہتھیاروں سے حملہ کرکے پولیس اہلکاروں اور سویلین کو نشانہ بنایا جس کے نتیجے میں اسسٹنٹ سب انسپکٹر عالمزیب آفریدی، اسسٹنٹ سب انسپکٹر قومندان آفریدی، کانسٹیبل شیر عالم ، راہگیر نائب شاہ اور رحمت خان شدید زخمی ہوگئے جنہیں فوری طور پر طبی امداد کیلئے ڈی ایچ کیو لنڈی کوتل منتقل کردیا گیا تاہم ہسپتال میں اسسٹنٹ سب انسپکٹر عالمزیب آفریدی اور راہگیر نائب شاہ ولد حاجی غریب شاہ خان سکنہ سدو خیل کی موت واقع ہونے کی تصدیق کردی گئی دواہلکاروں کی حالت تشویشناک ہونے پر پشاور منتقل کردیا گیا جہاں پر سپاہی شیر عالم زخموں کی تاب نہ لاتے ہوئے جاں بحق ہوگیا ۔حکام کا کہنا ہے کہ واقعہ کے بعد حملہ کی تلاش کیلئے مختلف مقامات پر ناکہ بندی کردی گئی ہے۔ ضلع بھر میں ناکے لگا کر سیکورٹی ہائی الرٹ کردی گئی ہے۔