خیبرپختونخوا میں بارش و سیلاب کے دوران 19افراد جاں بحق ،15زخمی

پشاور (اے پی پی)خیبرپختونخوا میں بارش و سیلاب کے دوران19افراد جاں بحق اور15زخمی ہوگئے،اموات کوہاٹ، باجوڑ، چترال ،دیر ، کوہستان ، ایبٹ آباد، ہری پور، سوات، چارسدہ، صوابی، وزیرستان اور ہنگو میں ہوئیں۔پی ڈی ایم اے کے مطابق 48گھنٹوں کے دوران خیبرپختونخوا میں بارشوں اور سیلاب کے باعث جاں بحق ہونے والے افراد میں 4 خواتین اور 11 بچے شامل ہیں جب کہ زخمیوںمیں 3 خواتین اور 6 بچے شامل ہیں۔تیر آندھی اور بارش کے باعث 61 گھروں کو نقصان پہنچا، جن میں 37 گھروں کو جزوی اور 24 گھر مکمل زمین بوس ہو گئے۔صوبہ کے مختلف اضلاع کوہاٹ، باجوڑ، چترال اپر و لوئر، دیر اپر، کوہستان اپر و لوئر، ایبٹ آباد، ہری پور، سوات، چارسدہ، صوابی، ساوتھ وزیرستان اور ہنگو میں بھی بارش سے حادثات رونما ہوئے۔متاثرہ علاقوں میں امدادی کارروائیاں جاری ہیں، بند شاہراہوں کو کھولنے کے لیے چھوٹی بڑی مشنری کو بروئے کار لیایا جا رہا ہے، پی ڈی ایم اے، ضلعی انتظامیہ اور امدادی ٹیمیں متاثرہ اضلاع میں امدادی سرگرمیوں میں مصروف عمل ہیں۔ پی ڈی ایم اے کی جانب سے متاثرہ اضلاع کی ضلعی انتظامیہ کو متاثرین کو جلد مالی و امدادی معاونت فراہم کرنے کی بھی ہدایت کر دی گئی ہے۔