بارکھان سمیت بلوچستان بھر میں سیاسی کارکنوں کو رہا کیاجائے،بی این پی

کوئٹہ (پ ر)بلوچستان نیشنل پارٹی کے مرکزی بیان میں بارکھان کے ضلعی صدر صدیق کھیتران ، گلزار عرف راجہ سمیت دیگر پارٹی کارکنوں پر مقدمات ، گھر پر چھاپے ، چادر و چار دیواری کے تقدس کی پامالی اسی طرح بلوچستان کے مختلف علاقوں میں سیاسی کارکنوں کی گرفتاریوں ، چھاپوں ، چار و چار دیواری کی پامالی بے بنیاد مقدمات قائم کرنے کی مذمت کرتے ہوئے کہاگیا ہے کہ نام نہاد جمہوری دور میں بلوچ ، پشتون ، ہزارہ ، سیٹلرز سمیت ہر ایک سےاظہار رائے کا حق بھی چھینا جا رہا ہے۔عملاً بلوچستان میں جمہوریت دکھائی نہیں دے رہی صرف حکمرانوں کی لفاظیت تک جمہوریت محدود ہے۔ اکیسویں صدی میں سماجی انصاف ، جمہور کا دور ہے لیکن بلوچستان میں اس کے برعکس معاملات چلائے جا رہے ہیں ماضی کی طرح اب بھی آمرانہ روش پر حکمران عمل پیرا ہیں۔ بیان میں کہا گیا کہ بارکھان سمیت بلوچستان بھر میں سیاسی جماعتوں کے کارکنوں کو رہا کر کے ان پر قائم مقدمات ختم کئے جائیں ۔چادر و چار دیواری کی پامالی کے سلسلے کو روکا جائے بلوچ روایات کو پاؤں تلے نہ روندا جائے۔