تحمل وبرداشت انسانیت کی زندگی کو پرامن بناتی ہے،جمعیت نظریاتی

کوئٹہ(پ ر)نورزئی قبیلے کے دو شاخوں کے درمیان تصفیہ کے موقع پر جمعیت علمائے اسلام نظریاتی ضلع کوئٹہ کے امیر مولانا قاری مہراللہ، صوبائی ڈپٹی جنرل سیکرٹری حاجی عبیداللہ حقانی، حاجی عبدالقادر، محمد نعیم اچگزئی،حاجی اللہ داد نورزئی، حاجی عبدالسلام بادینی،میر عبیداللہ توخی اور حمیداللہ نورزئی نے خطاب کرتے ہوئے کہا ہےکہ عفو ودرگزر کا شمارانسانیت کی اعلیٰ قدروں میں ہوتا ہے۔انہوں نے کہا کہ تحمل وبرداشت انسانیت کی زندگی کو پرامن اور پر سکون بناتی ہے۔ اسلام نے ہمیشہ تحمل وبرادشت کی تعلیم دی ہے۔ مسائل کے حل کےلیے اللہ تعالیٰ نے امت محمدیہ پر عظیم احسان وکرم کیا ہے کہ ایک جامع کتاب دی ہے رسولﷺ کے اخلاق میں اس فعل کو بہت زیادہ بلند مقام حاصل ہے۔ انہوں نے کہا کہ انسان خطاء کا پتلا ہے اگر اس کی اس فطری کمزوری کو مدنظر رکھ کر اس کی غلطیوں کو درگزر کیا جائے تو اس کے ذریعہ فتنہ و فساد کی روک تھام ہوتی ہے، بدبختیاں دور ہوجاتی ہیں اطاعت و عبادات کی راہیں ہموار ہوتی ہیں۔ ایک مثالی معاشرہ تشکیل پاتا ہے۔انہوں نے کہا کہ معاشرتی امن و امان اورباہمی ربط وتعاون بڑھانے کے لئے لوگوں کے مابین درپیش تنازعات اور لڑائی جھگڑوں کا خاتمہ ضروری ہے۔