قلات ، بیلہ میں بارش:ترقیاتی منصوبوں کا پول کھل گیا،N25 پر ٹریفک معطل

قلات+ بیلہ (نامہ نگاران )قلات شہر اور گردونواح میں گرج چمک کے ساتھ تیز بارش ہوئی جس سے نشیبی علاقے زیر آب آ گئے، بارش کا پانی کئی گھروں میں داخل ہوگیا۔ بارش کے پانی سے میونسپل کمیٹی کے دفاتر پانی میں ڈوب گئے، چند منٹ کی بارش سے پورا شہر پانی پانی ہوگیا۔ بارش نےترقیاتی منصوبوں کا بھی پول کھول دیا ،بارش کا پانی گلی کوچوں میں کھڑاہو گیا۔ قلات کے دیگر علاقوں کپوتو،محمد تاوہ،سرخین،علی دشت اور دیگر علاقوں میں بارش کی اطلاعات موصول ہوئی اور قلات کے پہاڑوں سے زاوہ ندی پانی کا ریلہ قلات کے وسط سے گزر گیا۔بیلہ سے نامہ نگار کے مطابق شمال مشرقی پہاڑوں پر موسلادھار بارشوں کے سبب ضلع لسبیلہ کے بڑے حصے کی ندی نالوں میں سیلاب کی سی صورتحال پیدا ہو گئی ہے ، مون سون کی بارشوں اور سیلابی ریلوں کے باعث اوتھل اور بیلہ کے درمیان قومی شاہراہ این 25 کے مختلف مقامات پر ٹریفک جزوی طور پر معطل رہا ۔ کئی مقامات پر شاہراہ کو نقصان بھی پہنچایا تاہم کسی جانی نقصان کی اطلاع نہیں ملی ، دوسری جانب وفاقی وزیرِ تجارت جام کمال خان کی سرپرستی میں کام کرنے والے لسبیلہ ویلفیئر ٹرسٹ کے انچارج رمضان جاموٹ رضاکاروں کے ہمراہ کسی بھی ہنگامی صورتحال سے نمٹنے کیلئے متاثرہ علاقوں کو پہنچ چکے ہیں۔