آئی پی پیز معاہدوں پر نظرثانی ، فرانزک آڈٹ کرایا جائے ، اسلام آباد چیمبر

اسلام آباد(کامرس رپور ٹر ) اسلام آباد چیمبر آف کامرس اینڈ انڈسٹری کےصدر احسن بختاوری نے آئی پی پیز معاہدوں کو انڈسٹری،بزنس کمیونٹی اور عوام کیلئے تباہ کن قرار دیتے ہوئے حکومت سے فوری معاہدوں پر نظر ثانی اور اب تک کی گئی ادائیگیوں کا فرانزک آڈٹ کرانے کا مطالبہ کیا ہے۔ان خیالات کا اظہار انہوں نے گزشتہ روز چیمبر ہاس میں ممبر قومی اسمبلی مرزا اختیار بیگ،نائب صدر انجینئر اظہر اسلام،سیکرٹری جنرل یو بی جی ظفر بختاوری،صدر انجمن تاجران پاکستان اجمل بلوچ سمیت دیگر کے ہمراہ پریس کانفرنس سے خطاب کرتے ہوئے کیا۔صدر آئی سی سی آئی نے کہا کہ آئی پی پیز پاکستانی معیشت کیلئے ناسور بن چکے ہیں۔ توانائی کی قیمتوں کی وجہ سے 30 فیصد انڈسٹری بند ہو چکی ہے۔ آئی پی پیز کا قبلہ درست کئے بغیر ملکی معیشت بہتر نہیں ہو سکتی۔ مرزا اختیار بیگ نے کہا کہ بزنس کمیونٹی کے مطالبات جائز ہیں، انہیں اسمبلی فلور پر اٹھائیں گے۔ انجینئر اظہر اسلام ظفر نے کہا کہ آئی پی پیز سے مہنگے معاہدوں کے ذمہ داروں کے خلاف بھی کارروائی کی جائے۔