اردو یونیورسٹی ،معاہداتی اور یومیہ اجرت پر 34غیر تدریسی ملازمین فارغ

کراچی( سید محمد عسکری) مالی بحران کا شکار وفاقی اردو یونیورسٹی نے معاہداتی اور یومیہ اجرت پر رکھے گئے 34غیر تدریسی ملازمین کو فارغ کردیا ہے فارغ کئے گئے ملازمین میں بے بی ڈے کیئر کی ڈائریکٹر، منتظم، آفس اسسٹنٹ، سرچر، جونیئر کلرک، لیب اسسٹنٹ، لیب اٹینڈنٹ، سیکورٹی گارڈ، نائب قاصد، ڈرائیور، کمپیوٹر آپریٹر، مالی اور خاکروب شامل ہیں یہ ملازمین سابقہ وائس چانسلرز کے ادوار میں بغیر کسی اشتہار کے رکھے گئے تھے مگر انھیں مستقل نہیں کیا گیا تھا،ان ملازمین کے معاہدے رواں سال جولائی میں ختم ہوئے تھے جن میں توسیع نہیں کی گئی اور مجسل (رجسٹرار) کی جانب سے برطرفی کا خط جاری کیا گیا جس میں ملازمین کے نام، عہدے اور تاریخ تکمیل ملازمت درج تھی اور لکھا تھا کہ ان کی معاہداتی اور یومیہ اجرت ملازمت اختتام پزیر ہوچکی ہے۔ وفاقی جامعہ اردو کے وائس چانسلر ڈاکٹر ضابطہ شنواری نے جنگ کو بتایا کہ وفاقی اردو یونیورسٹی مالی بحران کا شکار ہے، کوئی اضافی گرانٹ نہیں ملی ہے مستقل اور ریٹائرڈ ملازمین کو تنخواہیں دینے کے لیے رقم موجود نہیں ہے جب کہ سابق ادوار میں خلاف ضابطہ اور بلا ضرورت معاہداتی اور یومیہ اجرت پر درجنوں ملازمین کو رکھا گیا جو یونیورسٹی پر مالی بوجھ ہیں چناں چہ جن ملازمین کے معاہداتی اور یومیہ اجرت کی مدت ختم ہوتی جارہی ہے ان کو فارغ کیا جارہا ہے۔