برطانوی صحافی کو ویزا منسوخ کر کے واپس وطن بھجوا دیا گیا

اسلام آباد (رپورٹ:حنیف خالد) پاکستان تحریک انصاف کے بانی عمران خان سے ملاقات کرنے کیلئے پاکستان آنے والے برطانوی صحافی کو ویزا منسوخ کر کے وطن واپس بھیج دیا گیا،چارلز گلاس نے وزیر داخلہ محسن نقوی سے ای میل میں بانی پی ٹی آئی سے ملاقات کی اجازت مانگی تھی ۔ جیو نیوز کے ذرائع کے مطابق امریکی نژاد برطانوی صحافی چارلز گلاس کو وزارت داخلہ نے ویزا منسوخ کر کے واپس بھجوایا۔ ذ رائع کا کہنا ہے کہ چارلز گلاس کو اسلام آباد میں ایک گھر سے ائرپورٹ لے جا کر واپس بھجوایا گیا۔ اُنہوں نے وزیر داخلہ محسن نقوی کو ای میل میں بانی پی ٹی آئی عمران خان سے ملاقات کی اجازت مانگی تھی۔ ذرائع کے مطابق چارلز نے وزارت داخلہ کو بتایا تھا کہ اُنہیں عدالتی اجازت کے باوجود بانی پی ٹی آئی سے ملنے نہیں دیا گیا۔ واضح رہے کہ چارلز گلاس بانی پی ٹی آئی سے ملاقات کیلئے پاکستان آئے تھے۔