عوامی مسائل کی نشاندہی ہمارا فرض حل کیلئے کردار ادا کرنا ہے،گورنر پنجاب

فیصل آباد،لاہور(نمائندہ جنگ، اپنے نامہ نگار سے ) گورنر پنجاب سردار سلیم حیدر خاں نے فیصل آباد میں پیپلز پارٹی ورکرز کنونشن کے موقع پر میڈیا سے گفتگو کرتے ہوئے کہا کہ اس وقت ملک مشکل حالات سے دو چار ہے اور ہمیں صنعت کاروں،کسانوں اور محنت کشوں کے مسائل سن کر ان کے حل کے لئے کردار ادا کرنا ہے۔ انہوں نے کہا کہ یونیورسٹیوں میں جلد ہی مستقل وائس چانسلرز کی تعیناتی کر دی جائے گی۔قبل ازیں گورنر پنجاب نے نائب صدر پیپلز پارٹی سپورٹس ونگ پنجاب چوہدری ارشد جٹ کی رہائس گاہ کا دورہ کیا جبکہ چوہدری عدیل تاج کی رہائش گاہ جاکر ان کی اہلیہ کے انتقال پر اظہار تعزیت کی۔دریں اثناء گورنر نے کہا ہے کہ ہم حکومت کے ساتھ نہیں تاہم چاہتے ہیں حکومت پانچ سال پورے کرے۔ آئی پی پی ایز کے ساتھ ہمارے معاہدے ہوئے تو وہ کوئی قرآنی آیات نہیں جو تبدیل نہیں ہو سکتیں۔علاوہ ازیں گورنر سے لاہورمیں تعینات ایران کے قونصل جنرل مہران موحد فرنے گورنر ہائوس لاہور میں ملاقات کی۔