جرمنی نے نیٹو افواج کی ہنگامی حالات میں منتقلی کا خفیہ منصوبہ تیار کر لیا

برلن (نیوز ڈیسک) جرمنی کی فوج نے ہنگامی صورت حال میں عمل کیلئے ایک خفیہ منصوبہ وضع کیا ہے۔ اس کے تحت نیٹو افواج کو جرمنی کے راستے مغرب سے مشرق منتقل کیا جا سکتا ہے۔ جرمنی کے 2اخبارات بیلد اور دیر اشپیگل نے گزشتہ روز دستاویزات اور بیانات شائع کیے ہیں ان کے مطابق ہنگامی منصوبے کے مرکزی مشن میں نیٹو کے ہزاروں فوجیوں کی مشرق میں تعیناتی اور فورسز کو کمک کی فراہمی کو یقینی بنانا شامل ہے۔ یہ رپورٹ ایسے وقت میں سامنے آئی ہے جب جرمن وزیر دفاع بورس بیستورس سمیت کئی جرمن ذمے داران کا غالب گمان ہے کہ 2029تک روس اور نیٹو کے درمیان تنازع پیدا ہو جائے گا۔ شمالی اوقیانوس کے اتحاد نیٹو نے گزشتہ دنوںواشنگٹن میں اختتام پزیر ہونے والے اجلاس میں فیصلہ کیا تھا کہ جنگی طیاروں اور طیارہ شکن بیٹریوں کی ترسیل کے ذریعے یوکرین کے لیے کمک مضبوط بنائی جائے گی۔ اس کے جواب میں روس میں کریملن نے کہا کہ یوکرین کے ساتھ لڑائی میں ناٹو پوری طرح شامل ہو چکا ہے مزید یہ کہ روس اس سنگین خطرے کو قابو میں کرنے کے لیے تدابیر پر غور کر رہا ہے۔ دوسری جانب ترکیہ کے صدر رجب طیب اردوان نے کہا تھا کہ نیٹو اور روس کے درمیان براہ راست تنازع کا امکان تشویشناک ہے۔ اردوان نے زور دیا کہ ایسے کسی بھی اقدام سے گریز کرنا چاہیے جس کا سنگین انجام سامنے آئے۔