ڈارکی اسماعیل ہنیہ سے یادگار ملاقات‘خوشگوارجملوں کا تبادلہ

اسلام آباد (محمد صالح ظافر/ خصوصی تجزیہ نگار) نائب وزیراعظم اوروزیر خارجہ سینیٹر محمد اسحاق ڈار نے منگل کو فلسطین کے سابق وزیراعظم اور حماس کے لیڈر اسماعیل ہنیہ کے ساتھ تہران میں مختصر ملاقات کو یادگار اورحد درجہ خوشگوار قرار دیا ہے‘ اسحاق ڈار کا کہنا ہے کہ انہیں شہید فلسطینی رہنما کے پیار سے لبریز جذبات پوری زندگی یاد آتے رہیں گے اللہ رب العزت ان کی مغفرت فرمائے۔اسحاق ڈار منگل کی دوپہر ایران کے دارالحکومت پہنچے تھے اور اس پاکستانی وفد کی قیادت کررہے تھے جس نے ایران کے نو متخب صدر مسعودپزشکیان کی تقریب حلف برداری میں شرکت کی۔ اس موقع پر استقبالیہ ضیافت میں دوسرے عالمی رہنمائوں کے علاوہ ان کی اسماعیل ہانیہ سے بھی مختصر ملاقات ہوئی‘ ترکیہ کے وزیرخارجہ بھی ان کے ساتھ تھے‘ تینوں رہنمائوں نے خصوصی قرب کی علامت کے طور پر ایک دوسرے کے سر کو باہم ملایا۔ سینیٹر ڈار کے مطابق شہید اسماعیل ہانیہ نے ان کے علاوہ پاکستان اور اس کی قیادت کا احوال دریافت کرتے ہوئے ان کی بہتری اور بھلائی کے لئے دعا کی۔ اسحاق ڈار نے سماجی رابطے کی ویب سائٹ پر اپنی اسماعیل ہانیہ اور ترکی کے وزیر خارجہ مکان فدان کی ملاقات کی مختصر وڈیو بھی جاری کی ہے جس میں انہیں حد درجہ خوشدلی سے گفتگو کرتے دیکھا جاسکتا ہے۔سینیٹر اسحاق ڈاربدھ کی علی الصباح جب چک لالہ میں نور خان ایئر بیس پر اترے تو وہی وقت تھا جب تہران میں اسماعیل ہنیہ کو گائیڈڈ میزائل سے ہدف بنایا گیا تھا جس سے وہ موقع پر ہی شہید ہوگئے تھے۔