اسلام آباد، PTI کا دفتر کھل گیا، عمرایوب کا سامان کی چوری کا الزام

اسلام آباد (خبرنگار)اسلام آباد میں پاکستان تحریک انصاف کا مرکزی دفتر کھل گیا، ڈیوٹی مجسٹریٹ نے عدالتی حکم پر گذشتہ روز پی ٹی آئی کے مرکزی سیکرٹریٹ کو ڈی سیل کیا، پی ٹی آئی کا مرکزی سیکرٹریٹ 22 جولائی کو سیل کیا گیا تھا، ادھر تحریک انصاف کے سیکرٹری جنرل اور قومی اسمبلی میں اپوزیشن لیڈر عمر ایوب خان نے الزام لگایا ہے کہ ہمارے دفتر سے سامان چوری کر لیا گیا، معافی نہیں ملے گی، پارٹی کا مرکزی دفتر ڈی سیل ہونے پر صورتحال کا جائزہ لیا ہے، ہمارے دفتر سے ٹی وی ، کمپیوٹرز ، کیمرے ، دستاویزات چوری کر کے لے گئے ہیں،دفتر کی صورتحال دیکھ کر لگا کوئی قلعہ فتح کر لیا گیا ہو، رئوف حسن کے پرس سے پیسے نکال کر لے گئے، موجودہ آئی جی ، ایس ایس پی آپریشن ، ایس ایچ او ، چیئرمین سی ڈی اے اور ڈائریکٹر انرجی مینجمنٹ کیخلاف ایف آئی آر درج کروائیں گے ، جب تک یہ اپنی نوکریاں کرینگے ایف آئی آر ان کا پیچھا کرے گی۔ میں نے زندگی میں بہت سے لوگوں کو معافیاں مانگتے دیکھا ہے مگر ان کو معافی نہیں ملے گی۔