اسرائیلی فوج نے حماس اورحزب اللہ کمانڈروں پر ٹارگٹڈ حملے بڑھا دیئے،مزید9 فلسطینی شہید

غزہ، بیروت (آئی این پی) اسرائیلی فوج نے حماس، حزب اللہ کمانڈروں پر ٹارگٹڈ حملے بڑھا دیئے ہیں۔غیر ملکی میڈیا رپورٹس کے مطابق مقبوضہ مغربی کنارے میں اسرائیلی فوج کی جانب سے 2ڈرون حملے کیے گئے جس میں حماس کے عسکری ونگ القسام بریگیڈ کے کمانڈر سمیت 9فلسطینی شہید ہوئے۔ادھرشام کے دارالحکومت دمشق میں بھی چلتی گاڑی پر فضائی حملے میں ایک شخص ہلاک ہوا۔رپورٹ کے مطابق لبنان میں گاڑی پر اسرائیلی فضائی حملے میں حزب اللہ کے اہم کمانڈر علی عبد علی شہید ہوئے دوسری جانب حزب اللہ نے اپنےکمانڈر کی شہادت اورفلسطینی عوام کی حمایت میں شمالی اسرائیل کے قصبے بیت بلیل پر درجنوں کاتیوشا راکٹ داغ دیئے۔ سوشل میڈیا پر پوسٹ کی گئی فوٹیج میں اسرائیل کے آئرن ڈوم ایئر ڈیفنس سسٹم کو راکٹوں کو روکتے ہوئے دکھایا گیا ہے، تاہم اس حملے میں جانی نقصان کی کوئی اطلاع نہیں ہے۔دوسری جانب بیروت میں قائم امریکی سفارتخانہ نےمشرق وسطیٰ میں بڑھتی کشیدگی کے تناظر میں اپنے شہریوں سے کسی بھی دستیاب فلائٹ پر فوری طور پرلبنان چھوڑنے کی اپیل کی ہے،غیرملکی میڈیا کی رپورٹ کے مطابق یہ ایڈوائزری برطانیہ کے وزیر خارجہ ڈیوڈ لیمی کی اسی طرح کی انتباہ کے بعد سامنے آئی ہے، جس میں کہا گیا تھا کہ علاقائی صورتحال تیزی سے خراب ہو سکتی ہے۔