تحریک انصاف کا صوابی جلسہ تاریخی ثابت ہو گا، حماد اظہر

لاہور(نمائندہ جنگ ) تحریک انصاف کے رہنما میاں حماد اظہر نے کہا ہے کہ پی ٹی آئی کا صوابی کا جلسہ تاریخی جلسہ ثابت ہو گا۔ بانی چیئرمین عمران کی کال پر عوام کی بڑی تعداد جلسے میں شرکت کرے گی۔ قائم مقام صدر و جنرل سیکرٹری پی ٹی آئی پنجاب نے کہا کہ یہ جلسہ بانی چیئرمین عمران خان سمیت دیگر اسیران کی رہائی کیلئے ہو گا۔ میاں حماد اظہرنے کہا کہ جلسے سے پی ٹی آئی کی مرکزی صوبائی قیادت خطاب کرے گی۔ سیکرٹری اطلاعات پنجاب شوکت بسراء نے کہا کہ موجودہ حکومت نے عوام پر بجلی کے بم گرا دیئے ہیں۔ صوابی کا جلسہ کرپٹ حکمرانوں کے 14 طبق روشن کر دے گا۔ یہ جلسہ ظالم حکمرانوں سے عوام کو نجات دلانے کے لئے ہو گا۔ موجودہ حکمرانوں نے عوام کی سانسوں پر بھی ٹیکس لگا دیا موجودہ حکمران غریب عوام پر کسی قہر سے کم ثابت نہیں ہوئے ہیں۔