بھارت:مندر کی دیوار گرنے سے 9بچے ہلاک،متعدد افراد زخمی

نئی دہلی(آئی این پی)بھارتی ریاست مدھیہ پردیش میں مندر کی دیوار گرنے سے 9بچے ہلاک جبکہ متعدد افراد زخمی ہوگئے۔تفصیل کے مطابق ریاست مدھیہ پردیش کے ضلع ساگر میں مقامی لوگ عبادت کے لیے جمع تھے۔ حادثے میں ہلاک ہونے والے بچوں کی عمریں 10سے 15سال کے درمیان ہیں جبکہ حادثے میں متعدد افراد زخمی بھی ہوئے ہیں۔مدھیہ پردیش کے وزیراعلی موہن یادو نے ہلاک ہونے والے بچوں کے لواحقین کو 4لاکھ بھارتی روپے امداد دینے کا اعلان کیا ہے۔ بھارتی میڈیا کے مطابق دیوار گرنے کا واقعہ ممکنہ طور پر ریاست میں ہونے والی شدید بارشوں کے باعث دیوار کمزور ہونے سے پیش آیا جب کہ مقامی افراد کا بتانا ہے کہ مندر کی دیوار 50سال پرانی تھی۔