مقبوضہ کشمیر کی خصوصی حیثیت ختم کرنے کیخلاف کشمیری آج یوم ِاستحصال منائینگے

اسلام آباد ( نمائندگان جنگ ) کنٹرول لائن کے دونوں طرف اور دنیا بھر میں مقیم کشمیری بھارت کی طرف سے مقبوضہ کشمیر کی خصوصی حیثیت ختم کرنے کیخلاف آج یوم استحصال اور یوم سیاہ منائیں گے،قومی اسمبلی میں متفقہ قرارداد منظور کرائی جائے گی، اسلام آباد میں نائب وزیر اعظم اور وزیر خارجہ سینیٹر اسحاق ڈار کی قیادت میں کشمیر یکجہتی واک کی جائیگی ،نائب وزیر اعظم اور دیگر مقررین بعد ازاں واک کے شرکاءسے خطاب بھی کریں گے، انسٹی ٹیوٹ آف سٹریٹجک سٹڈیز اسلام آباد میں سیمینار ہوگا جس میں ترجمان دفتر خارجہ ممتاز زہرہ بلوچ خطاب کرینگی ،یوم استحصال کے موقع پر کشمیر کے مختلف حصوں میں سیمینارز،کانفرنسیں اور احتجاجی مظاہرے کیے جائیں گے، دنیا کے سامنے بھارت کے خونی چہرے کو بے نقاب کیا جائے گا اور 5 اگست 2019 سے انسانی حقوق کی صریح خلاف ورزیوں کو اجاگر کیاجائے گا، وفاقی وزیر امورکشمیر و گلگت بلتستان انجینئر امیر مقام نے کہا کہ 5 اگست کے ہندوستانی اقدام کے خلاف دنیا بھر میں یوم استحصال منایا جائے گا، 5 اگست جموں و کشمیر کی تاریخ کا سیاہ ترین باب ہے، پاکستان کشمیریوں کی جدوجہد آزادی کے منطقی انجام تک ان کی بھرپور سیاسی، سفارتی اور اخلاقی حمایت جاری رکھے گا، یوم استحصال کے موقع پر تمام سیاسی جماعتیں متحد ہوکر بھارتی اقدامات کے خلاف احتجاج کریں۔