پاک ترکیہ بحری افواج میں پیشہ ورانہ تعاون بڑھانے کا فیصلہ

اسلام آباد (رپورٹ:حنیف خالد) ترکیہ اور پاکستان بحری افواج کے مابین پیشہ ورانہ تعاون بڑھانے کا فیصلہ کیا گیا ہے۔ ترکیہ نیوی کے وفد نے اپنے سربراہ چیف آف سٹاف وائس ایڈمرل ابراہیم اوزیم کی قیادت میں گزشتہ روز پاکستان نیوی کے ہیڈ کوارٹرز اسلام آباد کا دورہ کیا۔ نیول ہیڈ کوارٹرز پہنچنے پر وائس چیف آف دی نیول سٹاف وائس ایڈمرل اویس احمد بلگرامی نے برادر ملک ترکیہ کی بحریہ کے قائد اور وفد کا پرجوش استقبال کیا۔ آئی ایس پی آر کے مطابق پاکستان کے امیر البحر چیف آف نیول سٹاف ایڈمرل نوید اشرف سے ملاقات کے دوران دونوں بحری افواج کے درمیان باہمی دلچسپی کے امور پر تبادلہ خیال ہوا اور پیشہ ورانہ تعاون کو مزید مضبوط بنانے کا فیصلہ ہوا۔ ترکیہ نیوی کے ایڈمرل نے خطے میں میری ٹائم سکیورٹی کے حوالے سے پاک بحریہ کی میری ٹائم سکیورٹی کی کاوشوں کی تعریف کی۔ پاک بحریہ اور ترکیہ بحریہ کے مابین چھٹے ماہرین کی سطح کے سٹاف مذاکرات نیول ہیڈ کوارٹرز میں ہوئے۔ مذاکرات کے دوران مشترکہ آپریشنل تربیت اور تکنیکی شعبوں سے متعلق وسیع امور پر بات چیت ہوئی۔ ترکیہ نیوی کے وفد کا یہ دورہ دونوں برادر ممالک کی بحری افواج کے درمیان مضبوط اور دیرینہ تعلقات کا آئینہ دار ہے۔ اس سے قبل ترکئے نیوی کے چیف آف سٹاف کی قیادت میں ترکئے بحریہ کے وفد نے کراچی میں پاک بحریہ کے فیلڈ کمانڈر سے اہم مذاکرات کئے تھے۔ ترک وفد نے مزار قائد پر حاضری دی اور بابائے قوم کو خراج عقیدت پیش کیا۔ دورے کے اختتام پر پاکستان اور ترکئے نیوی کے جنگی جہازوں نے بحیرہ عرب میں مشترکہ پٹرولنگ اور جنگی مشق میں حصہ لیا۔