بجلی چوری کیخلاف الگ عدالتیں اور تھانے بنانے کی خبریں غلط، پاور ڈویژن

اسلام آباد(این این آئی)پاورڈویژن نے بجلی چوری کے خلاف الگ عدالتیں اور تھانے قائم کرنے کی خبریں مسترد کردیں اور کہا بجلی چوری روکنے کی مہم پر آنیوالے اخراجات قطعی طور پرصارفین سے وصول نہیں کیے جاتے۔ پاور ڈویژن کی جانب سے جاری اعلامیے میں کہا گیا کہ بجلی چوری کیخلاف الگ عدالتیں اور تھانے قائم کرنے کی خبروں میں کوئی حقیقت نہیں،اس حوالے سے میڈیا کے مختلف حصوں میں آنے والی خبروں کا تمام مواد من گھڑت ہے۔ اعلامیے کے مطابق پاور ڈویژن کی طرف سے اس حوالے سے کوئی منصوبہ زیر غور نہیں ہے۔پاور ڈویژن کے مطابق وفاقی حکومت بجلی چوری کے خلاف مہم چلا رہی ہے اور اس مہم کیلئے تمام قانون نافذ کرنے والوں اداروں کی خدمات بھی حاصل کی جارہی ہیں۔