ماتحت خاتون افسر کو ہراساں کیوں کیا، کابینہ ڈویژن کے افسر کو سزا مل گئی

اسلام آباد (رانا غلام قادر) کابینہ ڈویژن میں بھی ایک مرد افسر کی جانب سے ماتحت گریڈ سترہ کی خاتون مائیکرو فلمنگ افسر کو ہراساں کئے جانے کا انکشاف ہوا ہے۔ انکوائری میں متعلقہ افسر کے خلاف ہراساں کئے جانے کی شکایت ثابت ہوگئیجوائنٹ سیکرٹری ایڈمن رانا منظور احمد نے انکوائری کی۔ خاتون افسر نے شکایت کی تھی کہ ان کے انچارج افسر ڈپٹی ڈائریکٹر ٹیکنکل این ڈی ونگ انہیں مسلسل ہراساں کر رہے ہیں۔ کیمروں سے ان کی مانیٹرنگ کرتے ہیں۔ ان کی سالانہ کارکردگی رپورٹس (PERS) کو دانستہ التواء میں رکھا ہوا ہے۔ ان سے رویہ غیر شائستہ ہے۔ انکوائری میں متعلقہ افسر کے خلاف کی گئی شکایات میں سے کچھ شکایات ثابت ہوگئیں۔ سیکرٹری کابینہ ڈویژن کامران علی افضل نے انکوائری رپورٹ کی روشنی میں ان کے خلاف انضباطی کارروائی کی منظوری دی۔ سیکرٹری کابینہ نے افسر کو 5 سال کیلئے سالانہ انکریمنٹ کو معطل کرنے کی سزا دی ہے۔ یہ کارروائی پروٹیکشن اگینسٹ ہراسمنٹ آف ویمن ایٹ ورک پلیس ایکٹ 2010 کی سیکشن 2(h) ( 11) کے تحت کی گئی ہے۔