ای اینڈ پی کمپنیوں کی سرمایہ کاری کیلئے تشکیل کمیٹی کا اجلاس نہ ہوسکا

اسلام آباد (خالد مصطفیٰ)ای اینڈ پی کمپنیوں کی سرمایہ کاری کیلئے تشکیل کمیٹی کا اجلاس نہ ہوسکا، کمیٹی میں نجی شعبے کی معروف کاروباری شخصیات اقبال زیڈ احمد اور غیاث عبداللہ پراچہ کے بھی نام شامل۔ تفصیلات کے مطابق نائب وزیر اعظم سینیٹر اسحاق ڈار کی سربراہی میں 18 رکنی کمیٹی تشکیل دی گئی جسے وزیر اعظم نے 5 جولائی 2024 کو تشکیل دیا تھا تاکہ تیل اور گیس کے شعبے میں ایکسپلوریشن اینڈ پروڈکشن (ای اینڈ پی) کمپنیوں سے 5 ارب ڈالر کی سرمایہ کاری کے منصوبے کو حتمی شکل دی جا سکے۔ کمیٹی کو گیس سیکٹر میں گردشی قرضے کے عفریت سے نمٹنے، ٹائٹ پالیسی 2024 کو فعال کرنے اور گیس سے متعلق دیگر امور پر منصوبوں پر کام کرنے کے لیے 3 ہفتوں کا مینڈیٹ دیا گیا تھا۔ تین ہفتے کا وقت گزر گیا لیکن کمیٹی کا اجلاس ابھی تک نہیں ہوا بلکہ اس مسئلے کے حل کے لیے کوئی لائحہ عمل سامنے لانے میں بھی ناکام رہا جس کا تیل اور گیس کے شعبے کو سامنا ہے۔ تاہم کمیٹی کے ایک رکن نے دی نیوز سے بات کرتے ہوئے کہا کہ جی ہاں ابھی تک کمیٹی کا اجلاس نہیں ہوا، لیکن مطلوبہ خاطر خواہ کام مکمل کر لیا گیا ہے جو مختلف امور پر کمیٹی سیکرٹریٹ کو پیش کر دیا گیا ہے۔ تاہم، کمیٹی پر نظر ثانی کی گئی ہے اور اس کے اراکین کی تعداد 18 سے بڑھا کر 20 کر دی گئی ہے۔ کمیٹی میں نجی شعبے کی معروف کاروباری شخصیات اقبال زیڈ احمد اور غیاث عبداللہ پراچہ کے نام شامل کیے گئے ہیں جس سے ظاہر ہوتا ہے کہ موجودہ حکومت گیس سیکٹر کے مسائل سے نمٹنے کے لیے جامع پلان پر کام کرنے میں کافی سنجیدہ ہے۔ نجی شعبے کے کھلاڑیوں کے ان پٹ کے ساتھ متفقہ منصوبے تک پہنچنے کے لیے نئے نام شامل کیے گئے ہیں۔