علی حیدر گیلانی پبلک اکاؤنٹس کمیٹی 2کے چیئرمین منتخب

لاہور(نمائندہ جنگ) پاکستان پیپلزپارٹی کے پارلیمانی لیڈرسید علی حیدر گیلانی کو پبلک اکاؤنٹس کمیٹی ٹو کا چیئرمین منتخب کرلیاگیا ہے۔ سید علی حیدر گیلانی کے تجویز کنندہ مسلم لیگ نون کے ملک اسد کھوکھر جبکہ تائید کنندہ پیپلز پارٹی کی رکن اسمبلی شازیہ عابد تھیں۔ پاکستان تحریک انصاف اور سنی اتحاد کونسل اِس سارے عمل کا حصہ نہیں تھے۔اجلاس پنجاب اسمبلی کمیٹی روم ٹو میں منعقد ہوا۔علی حیدر گیلانی نے کہا کہ میں کمیٹی ممبران کا شکریہ ادا کرتا ہوں جنہوں نے مجھ پر اعتماد کا اظہار کیا، میں کمیٹی کو دیانتداری سے چلانے کی بھرپور کوشش کروں گا، کسی انتقامی کارروائی پر یقین نہیں رکھتا، اپنے عہدے سے انصاف کروں گا۔