عالمی برادری کشمیریوں پرمظالم رکوانے کیلئے بھارت پر دباؤ ڈالے،یوسف گیلانی

اسلام آباد (صباح نیوز) چیئرمین سینیٹ سید یوسف رضا گیلانی نے کہا ہے کہ عالمی برادری مقبوضہ کشمیر میں ہونے والی انسانی حقوق کی بدترین پامالیوں اور مظالم کے تدارک کیلئے بھارت پر دباؤ ڈالے، تمام تر مسائل کا حل ڈائیلاگ ہے اور جنگ کسی بھی مسئلے کا حل نہیں ، تاریخ اس بات کی گواہ ہے کہ بین الریاستی مسائل ہمیشہ مذاکرات کی میز پر ہی حل ہوئے ہیں،مقبوضہ کشمیر کے عوام کی خواہشات اور اقوام متحدہ کی قرار دادوں کے مطابق اس دیرینہ مسئلے کو حل کرا ئے۔ مقبوضہ کشمیر کے یوم استحصال کے موقع پر اپنے پیغام میں انہوں نے کہا کہ 5 اگست تاریخ کا وہ سیاہ ترین دن ہے جب مقبوضہ کشمیر میں بھارتی حکومت نے انسانی حقوق کی پامالی کی ایک بد ترین مثال قائم کی اور مقبوضہ وادی میں لاک ڈاؤن کا نفاذ کر کے پوری وادی کو جیل میں تبدیل کر دیا،بھارتی حکومت کے 5 اگست کے اقدام سے خطے کے امن کے توازن کو شدید دھچکا لگا ہے اور علاقائی امن و امان کو شدید خطرات کے دہانے پر پہنچا دیا گیا،پاکستان مسئلہ کشمیر کا پر امن اور اقوام متحدہ کی قراردادوں کے مطابق حل چاہتا ہے ۔