برطانوی وزیراعظم نے مساجد کی سیکورٹی کیلئے 29ملین پونڈزجاری کردیے

مانچسٹر (ہارون مرزا) برطانوی وزیراعظم نے مساجد کی سیکورٹی کے لیے 29ملین پونڈزجاری کرتے ہوئے مسلم عبادت گاہوں،سکولوں کی حفاظت یقینی بنانے کی ہدایت کردی ۔دوسری جانب مسلمانوں پر تشددجاری ہے،جس سے بچنے کے لیے مسلم ڈیفنس لیگ قائم کردی گئی۔ تفصیلات کے مطابق برطانوی وزیراعظم سر کیئر سٹارمر نے مساجد کی حفاظت کے لیے 29 ملین پونڈ سے زائد کی رقم فوری طور پر جاری کر دی ہے اور کہا ہے کہ مسلمانوں کی عبادت گاہوں اور ان کے سکولوں کی ہر قیمت پر حفاظت کی جائے۔برطانوی وزیراعظم نے فوج اور پولیس کو خصوصی اختیارات دے دیے ہیں اور حکم دیا ہے کہ پرتشدد مظاہرین کے خلاف سخت ترین اقدامات اٹھائے جائیں اور انہیں قانون کے کٹہرے میں کھڑا کیا جائے۔ مسلمانوں کے خلاف تشدد کے 7دن گزرنے کے باوجود مظاہروں کا سلسلہ جاری ہے ۔ مڈلز برو میں فار رائٹ گروپ کے مظاہرین سڑکوں کو بند کر کے گاڑیوں کی تلاشی لیتے رہے ۔ مظاہرین نے ایشیائی ڈرائیوروں اور مسافروں کو تشددکانشانہ بنایااوران کی گاڑیاں نذرآتش کیں۔ انگلش ڈیفنس لیگ اور فار رائٹ گروپ کی طرف سے حملوں کی روک تھام کے لیے مسلمانوں نے بھی مسلم ڈیفنس لیگ قائم کرلی تاکہ وہ مسلمانوں کی عبادت گاہوں اور مدرسوں کی حفاظت کر سکیں۔