بھارت کاکشمیریوں کی خصوصی حیثیت چھینناانسانیت کیخلاف جرم ہے،محسن نقوی

لاہور (صباح نیوز)وفاقی وزیر داخلہ محسن نقوی نے کہا ہے کہ بھارت نے کشمیریوں کی خصوصی حیثیت چھین کر انسانیت کیخلاف جرم کیا،بین الاقوامی برادری کو کشمیری عوام کی آواز پر بیدار ہونا پڑے گا ۔یوم استحصال کشمیر کے موقع پر اپنے پیغام میں محسن نقوی نے کہا کہ 5اگست مقبوضہ جموں و کشمیر کی تاریخ کا سیاہ ترین دن ہے، بھارت نے 5 اگست2019کو غیر قانونی اور یکطرفہ اقدامات کر کے کشمیر کی حیثیت کو تبدیل کیا جس کی سخت الفاظ میں مذمت کرتے ہیں۔انہوں نے کہا کہ 5 اگست کو دنیا کے سامنے ناصرف ہندوستان کا مکروہ چہرہ بے نقاب ہوا بلکہ کشمیریوں پر نہ ختم ہونے والے مظالم بھی سب کے سامنے واضح ہوئے، کشمیری عوام کی جدوجہد کو سلام پیش کرتے ہیں۔مقبوضہ کشمیر کا بحران عالمی برادری کی بے حسی کا نوحہ ہے،عالمی برادری کو کشمیری عوام کی آواز پر بیدار ہونا پڑے گا۔ان کا مزید کہنا تھا کہ کشمیری بھائی اور بہنیں آزادی کی صبح ضرور دیکھیں گے۔