شہرت عمران خان کی وجہ سے ملی، مرنا جینا انہی کے ساتھ ہے ، شیر افضل مروت

اسلام آباد (آئی این پی ) پاکستان تحریک انصاف کے مرکزی رہنما ممبر قومی اسمبلی شیر افضل مروت نے کہا ہے میرا مرنا اور جینا عمران خان کے ساتھ ہے،14اگست کو 25 کروڑ عوام اپنے گھروں اور گاڑیوں میں تحریک انصاف کے جھنڈے لگائیں،قوم عمران خان کو رہا کروانے کے لیے بھرپور احتجاج کرے،عمران خان کے رہائی صرف باتوں سے نہیں ہوگی،اس کیلئے تحریک شروع کرنی ہوگی،کمروں میں بیٹھ کر تحریک شروع نہیں ہوتی،ملین مارچ کرنا ہوگا،اسلام آباد کا گھیرائوکرنا ہوگا،اسٹیبلشمنٹ کو بتا دیا ہے کہ عمران خان کے ساتھ ہمیشہ کھڑا ہوں اور رہوں گا،میری رکنیت کو ختم کرنے والے یہ بتائیں کہ نو مئی کے بعد قیادت کہاں تھی،سب چوہوں کی طرح بلوں میں گھس گئے تھے،14 اگست کو اپنے حلقے میں تاریخی جلسہ کروں گا،یہ جلسہ اپنے قائد عمران خان کے نام کرتا ہوں،پارلیمنٹ ہاوس کے بار میڈیا کے نمائندوں سے گفتگو میں انہوں نے کہا کہ میں کسی ایسے نوٹیفکیشن کو تسلیم ہی نہیں کرتا جو کہ عمران خان کے ہاتھوں سے جاری نہ ہوا ہو،عمران خان نے جس دن مجھے پارٹی سے نکال دیا اس دن میرا سیاست میں آخری دن ہوگا،عمران خان کے نام پر سیاست کی ہے اور اسی کے ساتھ چلتا رہوں گا ،عمران خان کے ساتھ غداری کا تصور بھی نہیں کر سکتا،انہوں نے کہا کہ میرے خلاف جو جھوٹا پروپیگینڈا کیا جا رہا ہے میں اس کی تردید کرتا ہوں،اگر میرے خلاف سازشیں ہوئی تو اس کا جواب دینا جانتا ہوں،جس شخص نے میرے پارٹی رکنیت کی منسوخی کا نوٹیفکیشن جاری کیا ہے وہ ایک ذہنی مریض سے آدمی ہے،یہ چند لوگوں کا گروپ ہے جو میرے خلاف سازشیں کر رہا ہے۔