دنیا یاد رکھے کشمیریوں کو انصاف ملنے تک ایشیا میں امن ، خوشحالی ممکن نہیں ، مریم نواز

لاہور(خصوصی نمائندہ)وزیر اعلیٰ پنجاب مریم نوازشریف نے کہا ہے کہ بھارت نے5اگست 2019ء کو مقبوضہ جموں و کشمیر کو کھلی جیل میں بدل کر جبرؤاستبداد کی نئی مثال قائم کی ہے۔ دنیا کب تک آنکھیں بند کرکے بیٹھے گی،کب تک کشمیری جبروبربریت کا شکار ہوتے رہیں گے؟۔ وزیر اعلیٰ مریم نوازشریف نے یوم استحصال کشمیر پر اپنے پیغام میں کہا کہ مقبوضہ کشمیر کے ہر شہید ہر مظلوم، محصور، ماؤں، بہنوں، بیٹوں اور بیٹوں کو سلام پیش کرتی ہوں۔ انہوں نے کہا کہ بھارت کے غیرقانونی اور غاصبانہ تسلط کے خلاف کشمیریوں کی لازوال قربانیاں رنگ لائیں گی۔ پاکستان دنیا کے ایوانوں میں کشمیریوں کی آواز اٹھاتا رہے گا۔وزیر اعلیٰ مریم نوازشریف نے کہا کہ مسئلہ کشمیر کے پرامن حل سے ہی جنوبی ایشیا میں پائیدار امن و استحکام اور ترقی خوشحالی ممکن ہے۔ہر پاکستانی کا دل کشمیری بھائیوں کے ساتھ دھڑکتا ہے۔ کشمیری بھائیوں کے ساتھ ہیں اور رہیں گے۔