پولیس کارکردگی جانچنے کیلئےبنائے گئے ’کارکردگی کے اہم اشاریوں‘ کی مانیٹرنگ

لاہور(آصف محمود بٹ) وزیر اعلیٰ پنجاب مریم نواز کے احکامات پر پنجاب پولیس کی کارکردگی جانچنے کے لئے بنائے گئے’’ کارکردگی کے اہم اشاریوں‘‘ ( Key Performance indicators, KPI,s) کی مانیٹرنگ شروع کر دی گئی ہے۔ وزیر اعلی ٰپنجاب، چیف سیکرٹری زاہد اختر زمان اور آئی جی پنجاب ڈاکٹر عثمان انور کی طرف سے جن ’’کے پی آئیز ‘‘کو مانیٹر کیا جارہا ہے ان میں جائیداد کے تنازعات پر 15پر موصول ہونے والی ایمرجنسی کالز کی بعدازاں ایف آئی آر میں تبدیلی، شکایات کو حل کرنے کے حوالے سے وقت کی پابندی، جائیداد کے تنازعات پر 15پر موصول ہونے والی ایمرجنسی کالز کا ماہانہ تجزیہ، صوبے بھر میں جرائم کے علاقوں (کرائم پاکٹس) کے خلاف لئے گئے ایکشن، پنجاب میں ’’نوگو ایریاز‘‘ اور غیر محفوظ سڑکوں (ہائی ویز) پولیس کی طرف سے لئے گئے ایکشن، صوبے بھر میں کئے گئے سرچ آپریشنز، پولیس کی طرف سے کئے گئے غیر معمولی آپریشنز اور پولیس مقابلے، بڑے منشیات فروشوں کی گرفتاری، امن عامہ کی غیر معمولی صورتحال کی صورت میں حالات کو کنٹرول کرنے، دہشت گردوں کے حملوں کو ناکام بنانا،اضلاع میں ٹریفک بلاک ہونے اور پبلک سروس ڈیلیوری کے حوالے سے کئے گئے نئے اقدامات شامل ہیں ۔