حکومت کے کانوں میں جوں نہ رینگی، 11 کو لاہور،12 کو پشاور میں دھرنے ،14 اگست کے بعد ملک گیر ہڑتال کی کال دینگے، حافظ نعیم

لاہور(نمائندہ جنگ) امیر جماعت اسلامی حافظ نعیم الرحمن ٰنے کہا ہے کہ حکومت کے کانوں پر جوں نہ رینگی تو 8اگست کو مری روڈسے آگے کی طرف بڑھیں گے۔ 11تاریخ کو لاہور، 12کوپشاورمیں عوامی دھرنے ہوں گے۔تاجروں،صنعت کاروں سے مشاورت مکمل کرلی ہے،14اگست کے بعد ملک گیر ہڑتال کی کال دیں گے،تمام تحصیلوں،اضلاع میں عوامی مطالبات کے حوالے سے آگاہی مہم کا آغاز ہوگا۔حکومت کو واضح طور پر کہنا چاہتا ہوں عوامی مطالبات کے لئے جدوجہد کریں گے،عام آدمی کا مقدمہ لڑیں گے۔حکمران بنگلہ دیش کے حالات سے سبق حاصل کرے۔بجلی کے بلوں میں کمی،تنخواہوں پر ٹیکسز کا خاتمہ،پٹرول لیوی کا خاتمہ اور آئی پی پیز کا فرانزک آڈٹ کرائے۔جماعت اسلامی پرامن سیاسی مزاحمت کے ذریعے جدوجہد کو جاری رکھے گی۔ان خیالات کا اظہار انہوں نے دھرنے کے شرکاء اور میڈیا سے گفتگو کرتے ہوئے کیا۔۔ حافظ نعیم الرحمنٰ نے کہا کہ حکومتی کمیٹی تلاش گمشدہ ہے،حکومت پہلے بازیاب کرائے پھر آن کیمرہ مذاکرات ہوں گے۔خود سے کمیٹیاں بنانا چھوڑ دے ہمیں اعلانات،کمیٹیاں نہیں بلکہ اقدامات چاہئیں۔مذاکراتی کمیٹی میں شامل لوگ انہی اداروں اور سیاسی جماعتوں کے نمائندے ہیں جن کی وجہ سے پاکستان آئی ایم ایف کا مقروض ہوا۔ نائب امیر جماعتِ اسلامی، صدر قائمہ کمیٹی سیاسی قومی اُمور لیاقت بلوچ نے دھرنا شرکاء سے خطاب اور میڈیا چینلز کو انٹرویو دیتے ہوئے کہا کہ شیخ مجیب الرحمنٰ خاندان دوسری مرتبہ اپنی عوام کے ہاتھوں ذلیل و خوار ہوگیا۔ حسینہ واجد نے خونی جنونی ہندوائی آمرانہ جمہوریت قائم کی۔ ہندوستان نے حسینہ واجد کو اپنے مقاصد کے لیے استعمال کیا اور عوام پر ظلم کی کھلی چھٹی دی اور اِسی ہندوستانی سرپرستی کی وجہ سے بنگلہ دیش میں حسینہ واجد کے خلاف نفرت عروج پر پہنچی اور بنگلہ دیشی عوام نے جان لیا کہ ہندوستان اُن کا دوست نہیں۔کشمیر پر سودے بازی کے داغ کو صاف کرنے کے لیے آزادی کشمیر کا روڈ میپ، ٹائم فریم ترتیب دیا جائے، کشمیریوں کی پشت بانی کے لیے پوری قوم کو یکسو اور متحد کیا جائے۔