خیبر پختونخوا ،صوبے کے بلدیاتی نمائندوں کا اعزازیہ بڑھانے کا فیصلہ

پشاور (اے پی پی) محکمہ خزانہ خیبر پختونخوا کی جانب سے صوبے کے بلدیاتی نمائندوں کا اعزازیہ بڑھانے کے لئے دستاویز جاری کر دی گئی ہے۔نوٹیفیکیشن کے مطابق تحصیل چیئرمین کا اعزازیہ100فیصد جبکہ تحصیل میئر کا اعزازیہ40ہزار سے بڑھا کر80ہزار کیا جائے گا۔اس کے علاوہ نیبر ہڈ کونسل اور ویلیج کونسل چیئرمین کا اعزازیہ20ہزار سے بڑھا کر 30 ہزار تک کئے جانے کا فیصلہ کیا گیا ہے دستاویز میں کہا گیا ہے کہ منتخب بلدیاتی نمائندوں کی اجرت اور الاؤنس رولز 2022 میں تبدیلی کرتے ہوئے ان کے اعزازیہ میں اضافے کا مقصد بلدیاتی نظام کو مزید مستحکم کرنا ہے۔دستاویز میں کہا گیا ہے کہ محکمہ خزانہ تحصیل میئر کے لئے سالانہ 344 ملین روپے سے زائد مختص کرے گا۔نیبر ہڈ کونسل اور ویلیج کونسل چیئرمین کے اعزازیہ کے لئے 2 ہزار 412 ملین روپے مختص کئے جائیں گے، اس کے ساتھ ہی بلدیاتی نمائندوں کے دفاتر کے لئے مختص کرایوں کی مد میں بھی فنڈز کا اجرا کیا جائے گا۔ان اقدامات کا مقصد جہاں بلدیاتی نظام کو مستحکم بنانا ہے وہیں عوامی نمائندگان کی کارکردگی کو بھی تیز کرنا ہے۔