وزیر اعظم کی ہدایت پر اولمپئین ارشد ندیم کے ڈیرے کو بجلی کی فراہمی کا حکم

لاہور (نمائندہ جنگ) وزیر اعظم پاکستان محمد شہباز شریف کی ہدایت پر اولمپکس میں گولڈ میڈل جیتنے والے کھلاڑی ارشد ندیم کے ڈیرے پر بجلی فراہم کرنے کا حکم دے دیا ہے۔میپکو نے وزیر اعظم کی ہدایت پر گولڈ میڈلسٹ ارشد ندیم کے چک 101/15 ایل میاں چنوں میں بجلی سسٹم اپ گریڈ کرنے کے لئے میٹریل پہنچا دیا ہے۔ میپکو کچا کھوہ اور کنسٹرکشن سب ڈویژنوں کی ٹیم ڈیرہ ارشد ندیم تک بجلی فراہم کرنے کے لئے پولز، ٹرانسفارمر اور لائن نصب کرے گی۔ارشد ندیم کی آبائی رہائش گاہ چک 101/15ایل کی آبادی 200گھروں پر مشتمل ہے اور گاؤں میں بجلی دستیاب ہے، گاؤں میں بجلی فراہمی کے نظام کی اپ گریڈیشن کیلئے مزید 4پولز او 100کے وی اے کا ایک ٹرانسفارمر نصب کیا جا رہا ہے۔