ڈونلڈٹرمپ کے خصوصی ڈنر میں پاکستانی نژاد شخصیت کی شرکت اور قربت

نیویارک (عظیم ایم میاں) ڈونالڈٹرمپ کے خصوصی ڈنر میں پاکستانی نژاد شخصیت کی شرکت اور قربت، امریکی اخبار نے ڈنر کو ’ہائی پاورڈ افیئر‘ قرار دیا، ٹرمپ سے کسی پاکستانی امریکن کی قربت کا پہلی بار ذکرکیا گیا۔ تفصیلات کے مطابق ری پبلکن صدارتی امیدوار ڈونالڈ ٹرمپ نے گزشتہ دنوں نیویارک کےنواحی اور متمول علاقے برج ہیمپٹن میں ایک ممتاز امریکی شخصیت کی رہائش گاہ پر مدعو کئے گئے تقریباً 130؍ کاروباری اور دولت مند افراد کے اہم اور شاندار ڈنر میں شرکت کی۔ اس ڈنر کی اہمیت کا اندازہ اس بات سے لگایا جاسکتا ہے کہ امریکا کے انتہائی ممتاز امریکی اخبار نے بھی ڈونالڈ ٹرمپ کے ساتھ بیٹھے ہوئے ممتازافراد کے نام لکھتے ہوئے اس ڈنر کوایک ’’ہائی پاورڈ افیئر‘‘ قرار دیتے ہوئے اس کی تفصیل بیان کی ہے ۔ امریکی میڈیا کے مطابق ڈونالڈ ٹرمپ کے ساتھ بیٹھے ہوئے ایک ارب پتی بل ایکمین اور ایک کاروباری کمپنی کے سربراہ امید ملک تھے۔