قومی بچت سکیموں پر شرح منافع میں کمی کا اعلان

اسلام آباد (آئی این پی) سینٹرل ڈائریکٹویٹ آف نیشنل سیونگز (سی ڈی این ایس) کی جانب سے قومی بچت اسکیموں پر شرح منافع میں ڈیڑھ فیصد کمی کا اعلان کردیا گیا۔ قومی بچت مرکز نے تین مختلف اسکیموں پر نئی شرح کے ریٹس جاری کردیئے، سیونگ اکائونٹس پر شرح منافع ڈیڑھ فیصد کم کرکے 19 فیصد مقرر کردیا گیا۔ اسکے علاوہ شارٹ ٹرم سیونگ سرٹیفکیٹ پرشرح 1.34 فیصد کم کرکے 17.90 فیصد کرنے کا اعلان کیاگیا۔ سروا اسلامک سیونگ اکانٹس پر شرح منافع ڈیڑھ فیصد کمی سے 19 فیصد مقرر کردی گئی جب کہ قومی بچت کی دیگر تمام اسکیموں پر شرح منافع برقرار رکھی گئی ہے۔ یاد رہے کہ گزشتہ برس دسمبر میں حکومت پاکستان نے قومی بچت اسکیموں کی شرح منافع میں ردوبدل کرتے ہوئے ڈیفنس سیونگ سرٹیفکیٹ کا منافع 14.46 اسکیم کرکے 14.34 فیصد کردیا تھا، اسکے علاوہ پینشنرز، بہبود، شہدا سرٹیفکیٹ کا منافع 16.32 سے کم ہوکر 16.08 فیصد ہوگیا تھا، ریگولر انکم سرٹیفکیٹ کا منافع 16.08 سے کم کرکے 15.12 فیصد مقرر کیا گیا تھا۔ وزارت خزانہ کی جانب سے جاری کردہ نوٹیفکیشن میں بتایا گیا تھا کہ اسپیشل سیونگز سرٹیفکیٹ کا اوسط منافع 18.17 سے کم کرکے 16.53 فیصد کردیا گیا، سیونگز سرٹیفکیٹ کا منافع 20.57 فیصد پر برقرار ہے، 5سالہ سروا اسلامک ٹرم سرٹیفکیٹ کا منافع 15.72 فیصد سے کم کرکے 15.66 فیصد کردیا گیا جبکہ 3سالہ سروا اسلامک سرٹیفکیٹ کا منافع 18.23 فیصد سے کم کرکے 18.00 فیصد کردیا گیا۔ ایک سالہ سروا اسلامک سرٹیفکیٹ کا منافع 21.80 فیصد سے کم کرکے 21.37 فیصد کردیا گیا تھا جبکہ سروا سیونگ اکانٹ کا منافع 20.50 فیصد پر برقرار رکھا گیا تھا۔