کل سے بعض مقامات پر مزید طوفانی بارشوں کی پیشنگوئی، الرٹ جاری

اسلام آباد (اپنے نامہ نگار سے )محکمہ موسمیات نے 14اگست کی شام رات سے 18اگست کے دوران مزید مون سون بارشوں کی پیشنگوئی کی ہے ، پہلے تین روز 14اگست کی رات سے 16اگست کے دوران طوفانی بارشوں کی توقع ہے ،تمام متعلقہ محکموں کو الرٹ جاری کر دیا گیا ہے ، اس دوران راولپنڈی اسلام آباد سمیت کشمیر ، پنجاب ، خیبرپختونخوا، بلوچستان، سندھ اور گلگت بلتستان کے زیادہ تر علاقوں میں بارشوں کا امکان ہے۔ شدید بارشوں سے پہاڑی علاقوں میں لینڈ سلائیڈنگ کا بھی خطرہ ہے ، مسافروں اور سیاح حضرات کو سفر کے دوران محتاط رہنے کی ہدایت کی گئی ہے۔ادھر اگلے چند روز کے دوران موسم گزشتہ سال کی نسبت سرد رہے گا جو جسم میں درد، گلے میں جلن، بخار، کھانسی اور سانس کے مسائل کا باعث بن سکتا ہے۔ڈائریکٹر جنرل محکمہ موسمیات مہر صاحبزاد خان کا کہنا ہے کہ یہ کوئی انہونی چیز نہیں اس طرح کے فینومنین ہوتے رہتے ہیں ۔