ارکان پنجاب اسمبلی کی شکایات پر سیکرٹری پرائمری اینڈ سیکنڈری ہیلتھ تبدیل

راولپنڈی(راحت منیر/اپنے رپورٹر سے) پنجاب میں ارکان صوبائی اسمبلی کی شکایات پر سیکرٹری پرائمری اینڈ سیکنڈری ہیلتھ علی جان کو ہٹایادیا گیا ۔ ارکان پنجاب اسمبلی کو سرکاری ہسپتالوں کی مانیٹرنگ کرنے کے فیصلہ میں مزاحمت پر محکمہ صحت پنجاب میں تبدیلیاں کی گئیں۔ذرائع کے مطابق محکمہ صحت میں تبدیلیوں کی بنیادی وجہ پنجاب کے  چارارکان صوبائی اسمبلی کی طرف سے سیکرٹری پرائمری اینڈ سکینڈری ہیلتھ کے خلاف تحاریک استحقاق پیش کرنے کو قرار دیا جارہا ہے۔ارکان اسمبلی کا کہنا ہے کہ سیکرٹری ہیلتھ نے وزیر اعلی پنجاب کے احکامات کی خلاف ورزی کی جس میں ارکان اسمبلی کو سرکاری ہسپتالوں کے دورے کرکے عوام کو سہولیات دینے کا کہا گیا تھا۔محکمہ صحت پنجاب ارکان اسمبلی کو سہولتیں دینے کی بجائے ارکان اسمبلی کی سفارشات پر عملدرآمد نہیں کررہا۔ ۔نئے احکامات کے تحت عظمت محمود کوسیکرٹری سپیشلائزڈ اینڈ میڈیکل ایجوکیشن پنجاب جبکہ نادیہ ثاقب کو سیکرٹری پرائمری اینڈ سکینڈری ہیلتھ تعینات کیا گیا ہے۔