فیض حمیداورPTIایک ہی نام ‘معاملہ دورتک جائےگا‘واوڈا

کراچی (ٹی وی رپورٹ )سینیٹر فیصل واوڈا کا کہنا ہے کہ فیض حمید اور پی ٹی آئی ایک ہی نام ہے‘ یہ شروعات ہے‘ معاملہ بہت دور تک جائےگا‘ابھی بہت بڑے بت گرنے ہیں۔ایک انٹرویو میں فیصل واوڈاکا کہناتھاکہ بات صرف کرپشن تک نہیں رہےگی‘ پی ٹی آئی کی ٹاپ لیڈر شپ بھی اس کا حصہ ہے، فیض آباد دھرنا کیس تو بہت چھوٹا ہے‘آنے والے دنوں میں بانی پی ٹی آئی اور پی ٹی آئی زمین پر لیٹ جائےگی۔جس جس نے ان کی پشت پناہی کی ہے وہ جان لیں بڑے بڑے بت گرنے ہیں‘ جو آئین اورقانون کے ٹھیکیدار بنے ہوئے ہیں سب کی باری آنی ہے۔کوئی ادارہ پاکستان کا باپ نہیں ہے ٹھوک بجا کر انصاف ہوگا۔یہ ایسا کام ہوا ہے کہ پاکستان کی تقدیر بدل جائے گی‘اس خاص کی گرفتاری کے بعد آپ کو عمران خان سمیت پوری پارٹی لیٹی ہوئی نظر آئے گی گولے گنڈے کی طرح ٹھنڈی اور شہد کی طرح میٹھی ہوگی‘ارشد شریف کا قتل کیس کھلے گا۔فیض حمید کی پکڑ کے بعد ان کے سہولت کار جو ابھی جگہوں پر موجود ہیں جو آئین اور قانون کے باپ ہیں ان کی بھی باری آگئی ہے۔ابھی ان کی بھی باری آنی ہے جو کنٹینر کے اندر فون کرتے تھے ۔پختونخوا کے وزیراعلیٰ کی باتیں سنتے تھے یا عمر ایوب ہوں یہ سب سیدھے ہوجائیں گے۔آرمی چیف اپنے ادارے کے چیف جسٹس ہیں انہوں نے انصاف کر کے دکھایا ہے۔ہاتھ دینے کا سوال ہی پیدا نہیں ہوتا ‘سیاسی طور پر لیٹ تو گئے ہیں ۔اب سب اچھے بچے بن جائیں گے جن میں تحریک انصاف سرفہرست ہوگی۔