میرا ری ہیب سوات میں اچھا چل رہا ہے، پیسر احسان اللہ

کراچی(نمائندہ جنگ)فاسٹ بولر احسان اللہ نے اپنے والد کے بیان کی چند گھنٹے میں مخالفت کرتے ہوئےکہا ہےکہ میرا ری ہیب سوات میں اچھا چل رہا ہے۔ہفتے کوسوشل میڈیا پر جاری اپنے بیان میں فاسٹ بولر احسان اللہ کا کہنا تھا کہ میری کہنی کا خم اور سیدھے بازو کا اینگل ٹھیک ہو رہا ہے، میں جلد کم بیک کروں گا۔ میڈیا پر خبر آئی کہ میرا ری ہیب اچھا نہیں چل رہا، پی سی بی کو درخواست کرتا ہوں میرا ری ہیب اچھا چل رہا ہے مجھے سوات میں ہی رہنے دیں۔قبل ازیں احسان اللہ کے والد نے ایک بیان میں چیئرمین پی سی بی محسن نقوی سے بیٹے کی لاہور میں دیکھ بھال کی درخواست کی تھی۔ان کے والد کا کہنا تھا کہ میرے بیٹے کو این سی اے میں منتقل کرکے علاج کیا جائے، سوات میں سہولیات اچھی نہیں، میرے بیٹے کو لاہور بلایا جائے۔واضع رہے کہ احسان اللہ گزشتہ ایک سال سے زائد عرصے سے کہنی کی انجری کا شکار ہیں، اس دوران ان کا آپریشن بھی ہوا اور انگلینڈ میں ان کا چیک اپ بھی کرایا گیا جس کے بعد پی سی بی کی ایک کمیٹی نے احسان اللہ کی سرجری اور علاج پر سوالات اٹھائے اور پھر ان کے طویل ری ہیب کی تجویز دی۔