ریتی بجری چوری، ڈی سی ملیر کا کمشنر کو خط SHOمائنز کیخلاف کارروائی کی سفارش

کراچی (اسٹاف رپورٹر) ڈپٹی کمشنر (ڈی سی) ضلع ملیر عرفان سلام میروانی نے ملیر ندی اور ضلع کے دیگر ندی نالوں سے ریتی اور بجری کی چوری پر کمشنر کراچی کو خط لکھ دیا، جس میں ایس ایچ او مائنز اینڈ منرل کے خلاف کارروائی کی سفارش کی گئی ہے۔خط کی کاپیاں سیکریٹری داخلہ سندھ، سیکریٹری مائنزاینڈ منرل،ایڈیشنل انسپکٹر جنرل (آئی جی) پولیس کراچی اور دیگر متعلقہ حکام کو بھی بھیجی گئی ہیں۔ ڈی سی ملیر نے اپنے خط میں کہا ہے کہ چوروں کو مائنز اینڈ منرل کے ایس ایچ او اور لوکل پولیس کی سرپرستی حاصل ہے اور چند دنوں سے کچھ مقامات سے ریتی اور بجری چوری کی جارہی ہے، جب کہ سندھ حکومت اور عدالت نے ملیر ندی سے ریتی بجری نکالنے پر پابندی عائد کر رکھی ہے۔