حکومت کا شہید ڈپٹی کمشنر پنجگور کے اہل خانہ کیلئے 2 کروڑ روپے امداد کا اعلان

اسلام آباد (طاہر خلیل) وفاقی حکومت کی طرف سے شہید ڈپٹی کمشنر پنجگور ذاکر بلوچ کے اہل خانہ کے لئے 2 کروڑ روپے امداد کا اعلان۔ وزیر داخلہ محسن نقوی نے مرحوم ڈپٹی کمشنر کے والد کو پلاٹ کا الاٹمنٹ لیٹر بھی دیا۔ وفاقی وزیر داخلہ محسن نقوی مستونگ میں شہید ہونے والے ڈپٹی کمشنر پنجگور ذاکر بلوچ کی تربت میں واقع رہائش گاہ گئے۔ وزیر داخلہ نے شہید ڈپٹی کمشنر ذاکر بلوچ کے والد کنر بلوچ، بھائیوں اور دیگر اہل خانہ سے ملاقات کی۔ انسپکٹر جنرل فرنٹیئر کور ساؤتھ بلوچستان میجر جنرل بلال سرفراز خان بھی ان کے ہمراہ تھے۔ ذاکر بلوچ کی شہادت پر گہرے دکھ اور افسوس کا اظہار کرتے ہوئے وزیر داخلہ محسن نقوی نے شہید کے والد کو دلاسہ دیا اور ان کے حوصلے کو سراہا۔ وزیر داخلہ محسن نقوی نے صدر پاکستان آصف علی زرداری اور وزیراعظم شہباز شریف کی جانب سے شہید کے والد کو خصوصی تعزیتی پیغام پہنچایا۔ محسن نقوی نے کہا کہ شہید ذاکر بلوچ کی فیملی کا خیال رکھنا ہماری ذمہ داری ہے، آپ جیسے حوصلہ مند والد پر فخر ہے۔ ڈپٹی کمشنر پنجگور ذاکر بلوچ فرض شناس، محنتی اور بہادر افسر تھے۔ انہوں نے شہید ڈپٹی کمشنر پنجگور ذاکر بلوچ کے درجات کی بلندی اور اہل خانہ کے لئے صبر جمیل کی دعا کی۔