190ملین پاؤنڈ کیس،ملزمان کے وکلاء کی استدعا پر سماعت بدھ تک ملتوی

اسلام آباد (جنگ رپورٹر)اسلام آباد کی خصوصی احتساب عدالت کے جج ناصر جاوید رانا نے تحریک انصاف کے سابق چیئرمین اور ان کی اہلیہ بشری بی بی کے خلاف 190 ملین پاؤنڈ ز سکینڈل پر مبنی القادر ٹرسٹ ریفرنس کی سماعت ملزمان کے وکلا ء کی استدعا پر 21 اگست(بروز بدھ) تک ملتوی کردی ہے جس کی وجہ سے نیب کے اہم گواہ اور ریفرنس کے تفتیشی افسر پر ہفتہ کے روز چھٹی مرتبہ بھی جرح نہ ہو سکی، گزشتہ روز سماعت کے موقع پر دونوں ملزمان کے علاوہ نیب کے پراسیکیوٹر جنرل سردار مظفر عباسی، امجد پرویز جبکہ ملزمان کے وکلا بیرسٹر سلمان صفدر، عثمان گل اور ظہیر عباس چوہدری میں پیش ہوئے اس موقع پر نیب کے تفتیشی افسر میاں عمر ندیم بھی موجود تھے جن پر ملزمان کے وکلا نے جرح کرنا تھی تاہم ان پر جرح نہ ہوسکی، ملزمان کے وکلا ء نے دوران سماعت نئی درخواست عدالت میں جمع کرادی، جس میں موقف اختیار کیا گیا ہے کہ ٹرائل کورٹ نے نیب کی 23 اپریل 2020 کی بورڈ میٹنگ سے متعلق ہماری جو درخواست خارج کی تھی، اس حکم کو اسلام آباد ہائی کورٹ میں چیلنج کردیا گیا ہے اور اسلام آباد ہائی کورٹ میں 19 اگست کو کیس سماعت ہے،اس لئے آج اس مقدمہ کی سماعت ملتوی کی جائے جس پر نیب کے وکیل نے اعتراض کیا کہ ملزمان کے وکلاء تاخیری حربے استعمال کررہے ہیں ،چھٹی مرتبہ تفتیشی افسر پر جرح کرنے سے وکلائے صفائی عذر پیش کررہے ہیں، جس پر عدالت نے ملزمان کے وکلاء کو آخری موقع دیتے ہوئے سماعت 21 اگست تک ملتوی کردی ۔