عمران خان نے گلے لگایا، آج ہم شیرو شکر ہوگئے، شیر افضل کے پارٹی سے اختلافات ختم

راولپنڈی (سٹاف رپورٹر) پاکستان تحریک انصاف کے رکن قومی اسمبلی شیر افضل مروت نے کہا ہے کہ عمران خان نے مجھے گلے لگالیا، آج ہم شیرو شکر ہوگئے،تمام اختلافات ختم کردئیے ہیں، ہفتہ کواڈیالہ جیل کے باہر میڈیا سے گفتگو کرتے ہوئے شیر افضل مروت نے کہا کہ آج 3 ماہ بعد بانی پی ٹی آئی سے ان کی ملاقات ہو گئی، میں نے ہاتھ ملایا تو بانی پی ٹی آئی نے مجھے گلے لگایا، ملاقات کے دوران کچھ شکوے میں نے کئے اور کچھ عمران خان نے کئے ، بانی پی ٹی آئی نے تمام قیادت کو مجھے 22 اگست کے جلسے کی ذمہ داری سونپی ہے،شیر افضل مروت نے کہا کہ عمران خان کی ہدایت پر تمام اختلافات ختم کردئیے ہیں، میری طرف سے معافی ہے، انہوں نے کہا کہ شیر افضل مروت کو پارٹی سے صرف عمران خان نکال سکتا ہے، میں نے انہیں کہا کوئی گلہ آئے تو بیرسٹر گوہر اور علی امین سے پوچھیں،اب اگر کوئی 9 مئی ہوتا ہے تو اس کی ذمہ داری میں لوں گا، اب میں تمام پلاننگ بانی پی ٹی آئی سے پوچھے بغیر کروں گا، پھر بعد میں کوئی یہ نہ کہے کہ عمران خان کے حکم پر ہوا ہے،ہم پر امن احتجاج کریں گے۔