14اگست تجدید عہد‘ ملکی ترقی کیلئے کردار ادا کرنا ہوگا‘ ایوان صنعت و تجارت

کوئٹہ(اسٹاف رپورٹر)ایوان صنعت و تجارت کوئٹہ بلوچستان کے صدر حاجی عبداللہ اچکزئی ،سینئر نائب صدر حاجی آغاگل خلجی اور نائب صدر عبدالاحد آغا نے کہا ہے کہ جو قومیں آزادی جیسی نعمت کی قدرنہیں کرتیں وہ صفحہ ہستی سے مٹ جاتی ہیں،14 اگست پاکستانیوں کےلئے تجدید عہد کا دن ہے،ہم سب کو مل کر ملک وقوم کی ترقی کےلئے اپنا کردار ادا کرنا ہوگا۔ان خیالات کا اظہار انہوں نے 14 اگست کی صبح ایوان صنعت و تجارت کوئٹہ میں پرچم کشائی کے موقع پر کیا۔اس سے قبل چیمبر آف کامرس اینڈ انڈسٹری کوئٹہ بلوچستان کے عہدیداران و ارکان کی جانب سے یوم آزادی کے موقع پر پرچم کشائی اور کیک کاٹا گیا۔انہوں نے کہا کہ آزادی سے بڑھ کر کوئی نعمت نہیں، آزادی کی قدر ان قوموں سے پوچھیں جو غلام ہیں ۔برصغیر کے مسلمانوں کی لازوال قربانیوں کی بدولت 14 اگست 1947 کو پاکستان معرض وجود میں آیا اب ہمیں اپنے آبائواجداد کی قربانیوں کی بدولت ملنے والی آزادی کی قدرکرنا ہوگی ہمیں یہ عہد کرنا ہوگا کہ ملک و قوم کی ترقی کےلئے سب کومل کر کردار اداکرنا ہوگا۔