محکمہ صحت میں کنٹریکٹ پر بھرتیوں کا فیصلہ قبول نہیں، ینگ ڈاکٹرز

کوئٹہ(اسٹاف رپورٹر)ینگ ڈاکٹرز ایسوسی ایشن کے صدر ڈاکٹر کلیم اللہ نے صوبائی حکومت کی جانب سے محکمہ صحت اور تعلیم میں کنٹریکٹ پر بھرتیوں کے فیصلے کو مسترد کرتے ہوئے کہا ہے کہ حکومت یہ فیصلہ واپس لے بصورت دیگر احتجاج پر مجبور ہوں گے ، یہ بات انہوں نے ہفتہ کو کوئٹہ پریس کلب میں ڈاکٹر بہار شاہ ، امان بلوچ ، صبور کاکڑ کے ہمراہ پریس کانفرنس کرتے ہوئے کہی ۔ڈاکٹر کلیم اللہ اور دیگر نے کہا کہ حکومت کنٹریکٹ سسٹم لاگو کرکے محکمہ صحت کو مزید تباہ کرنے پر تلی ہوئی ہے، ڈیڑھ سو سے زائد ڈاکٹر ایڈہاک کی بنیاد پر صوبے میں خدمات انجام دے رہے ہیں جو تاحال تنخواہوں سے محروم ہیں ، مستقل ملازمت ڈاکٹروں کا حق ہے اگر حکومت نے سنجیدگی کا مظاہرہ نہ کیا تو اپنا حق لینے کے لئے ہر حد تک جانے کے لئے تیار ہیں۔انہوں نے کہا کہ دیگر ممالک میں جہاں اگر ایڈہاک پر بھرتیاں کی جاتی ہیں تو وہاں سہولیات بھی زیادہ دی جاتی ہیں جبکہ بلوچستان میں ڈاکٹروں کو کوئی سہولت حاصل نہیں۔ انہوں نے کہا کہ حکمران اپنی کوتاہیوں کا ملبہ ڈاکٹر پر ڈال کر بری الذمہ ہونے کی کوشش کرتے ہیں ۔ انہوں نے کہا کہ بلوچستان میں اس جدید دور میں تین میڈیکل کالجز گزشتہ 15 سال سے زیر تعمیر ہیں اس جانب بھی کوئی توجہ نہیں دی جاتی ، تینوں میں سے صرف ایک میڈیکل کالج فعال ہے ۔ ایک سوال پر انہوں نے کہا کہ اگر ہمارے مطالبات پر عملدرآمد نہ کیا گیا تو احتجاجی مظاہرے اور دھرنے دیئے جائیں گے۔