پاک فضائیہ نے ملک کی تمام ایئر بیسوں پر یوم شہداء منایا ،یوم بحریہ آج منایا جائے گا

لاہور(جنرل رپورٹر)پاک فضائیہ نے ملک کی تمام ایئر بیسوں پر یوم شہداء منایا جبکہ یوم بحریہ آج منایا جائے گا ۔ دن کا آغاز ایک پروقار تقریب سے ہوا، جس میں 1965 اور 1971 کے معرکوں کے دوران اور قیام پاکستان سے لے کر آج تک ملک کی خاطر اپنی جانوں کا نذرانہ پیش کرنے والے تمام شہداء کے لیئے خصوصی دعاؤں اور قرآن خوانی کا احتمام کیا گیا۔سربراہ پاک فضائیہ، ائیر چیف مارشل ظہیر احمد بابر سدھو، ائیر ہیڈ کوارٹرز اسلام آباد میں منعقدہ یوم شہداء کی تقریب کے مہمان خصوصی تھے۔ اس موقع پر خطاب کرتے ہوئے ائیر چیف نے کہا کہ پاک فضائیہ نے قربانیوں، بہادری اور پیشہ ورانہ مہارت کی ایک قابل فخر تاریخ رقم کی ۔ ائیر چیف نے کہا کہ ہم انکے عظیم کارناموں پر ان کے شکر گزار ہیں،جنہوں نے آنے والی نسلوں کے لیے قربانی کی اعلیٰ مثال قائم کی۔ بعد ازاں سربراہ پاک فضائیہ نے شہداء کو خراج عقیدت پیش کرنے کے لیے یادگار شہداء پر پھولوں کی چادر چڑھائی اور فاتحہ خوانی کی۔ دریں اثنا آج 8ستمبر کو یومِ بحریہ منایا جائے گا جو ہماری بحری تاریخ کا ایک یاد گار دن ہے ۔اس دن ہمارے نڈر جوان غیر متزلزل عزم سے سرشارہو کر بہادری اور بے خوفی کے ساتھ دشمن پر حملہ آور ہوئے۔ یہ دن ان بہادر آفیسرز اور سیلرز کی بے لوث قربانیوں کو خراجِ تحسین پیش کرنے کے لیے منایا جا تا ہے جن کی مثالی بہادری ہماری آنے والی نسلوں کو ہمیشہ ایک راہ دکھاتی رہے گی اور ہماری قوم میں حب الوطنی کی لو جگائے رکھے گی۔