سپریم کورٹ سے دو قیمتی کمپیوٹر غائب،ایف آئی آردرج

اسلام آباد(آئی این پی ) سپریم کورٹ آف پاکستان کی عمارت میں موجود کمرے سے 2قیمتی کمپیوٹر سسٹم چوری ہو گئے ، جس کا مقدمہ درج کر لیا گیا۔ پولیس کا کہنا ہے کہ ڈائریکٹر آئی ٹی سپریم کورٹ کی جانب سے درخواست پر تھانہ سیکرٹریٹ میں کمپیوٹر چوری ہونے کا مقدمہ درج لیا گیا ہے۔ ایف آئی آر کے متن کے مطابق کمپیوٹرز کو تیسرے فلور کے کمرے میں منتقل کیا گیا تھا، سینئر ڈپٹی ڈائریکٹر نیٹ ورک نے جب معائنہ کیا تومعلوم ہوا 2 نئے کمپیوٹر غائب ہیں۔ مقدمے کے متن میں مزید کہا گیا ہے کہ نئے آنے والے کمپیوٹرز میں ایل سی ڈی اور سی پی یو شامل تھا، جبکہ سی سی ٹی وی میں 2 ملازمین زاہد اورفیصل کو مشکوک نقل و حرکت کرتے دیکھا گیا ہے۔خیال رہے کہ ایف آئی آر کے متن کے مطابق چوری ہونے والے دونوں کمپیوٹرز کی مالیت تقریبا 6 لاکھ روپے ہے۔