راولپنڈی میں جائیداد کی فروخت ، تحفے یا ٹراسفرکیلئے کلیئرنس سرٹیفکیٹ لازمی

راولپنڈی (ساجد چوہدری) راولپنڈی ڈویلپمنٹ اتھارٹی نے کسی بھی جائیداد کی فروخت ، تحفہ یا تبادلہ کیلئے پراپرٹی ٹیکس واجبات کا کلیئرنس سرٹفیکیٹ لازمی قرار دیدیا ۔ اس حوالے سے ڈائریکٹر جنرل آر ڈی اے نے پنجاب اربن امووایبل پراپرٹی ٹیکس ایکٹ 1958 کی سیکشن 16A کا حوالہ دیتے ہوئے ہدایت کی کہ قانون کی مذکورہ شق کے مطابق تمام سب رجسٹرار ، کوآپریٹو سوسائٹیز کے ایڈمنسٹریٹر قانونی طور پر اس بات کے پابند ہیں کہ غیر منقولہ جائیداد کی فروخت، تحفہ یا تبادلے کے کسی بھی دستاویز کی اجازت دینے سے پہلے اس بات کو یقینی بنائیں کہ بقایا پراپرٹی ٹیکس ادا کر دیا گیا ہے کیونکہ نئے خریدار/ غیر منقولہ جائیدادوں کے مالکان/مستحقین کو پراپرٹی ٹیکس بقایا جات ادائیگی میں مسائل کا سامنا کرنا پڑتا ہے جو پچھلے مالک نے ادا نہیں کیا تھا۔ ڈی جی آر ڈی اے نے حکم نامے میں کہا کہ سول لائنز راولپنڈی ضلع میں کسی بھی غیر منقولہ جائیداد کی فروخت یا منتقلی سے پہلے تمام متعلقہ افسران اور ہاوسنگ سوسائٹیز کے انتظام کے چیف پلانر متعلقہ ایکسائز اینڈ ٹیکسیشن افسران سے پراپرٹی ٹیکس کی ادائیگی کے کلیئرنس سرٹیفکیٹ کے حصول کو یقینی بنائیں۔