ارشد شریف قتل کیس، ن لیگ کی قیادت کیخلاف اندراج مقدمہ کی درخواست مسترد

اسلام آباد (این این آئی)اسلام آباد کے ڈسٹرکٹ اینڈ سیشنز کورٹ نے ارشد شریف قتل کیس میں مسلم لیگ(ن) کی قیادت کیخلاف اندراج مقدمہ کی درخواست مسترد کردی۔درخواست گزار شاکر علی نے نواز شریف، شہباز شریف، مریم نواز اور دیگر کے خلاف اندراج مقدمہ کی درخواست دائر کی تھی۔ ایڈیشنل سیشن جج رانا مجاہد رحیم نے ارشد شریف قتل کیس کے اندراج مقدمہ میں مسلم لیگ(ن) کی قیادت مسترد کرتے ہوئے تحریری فیصلہ جاری کردیا۔ فیصلے میں کہا گیا کہ صحافی ارشد شریف کے قتل کا معاملہ سپریم کورٹ میں زیر التوا ہے اور ارشد شریف کے اہلخانہ سپریم کورٹ میں معاملے کی پیروی کر رہے ہیں۔ عدالت نے کہا کہ درخواست گزار کے پاس اہل خانہ کے مقدمے کو پس پشت ڈال کر نیا مقدمہ درج کرانے کا اختیار نہیں اور اخباری تراشوں اور خطوط سے لیگی قیادت کا ارشد شریف قتل میں ملوث ہونا ثابت نہیں ہوتا۔ عدالت نے فیصلے میں کہا کہ درخواست گزار اپنی مرضی کے ملزمان نامزد کرنے کا اختیار نہیں رکھتا لہٰذا لیگی رہنماؤں کیخلاف اندراج مقدمہ کی درخواست کو مسترد کیا جاتا ہے۔